Urwego rw’Igihugu rw’Ubugenzacyaha (RIB) rwongeye gusaba ababyeyi, abarimu n’abandi barera abana kureka ibihano bibagiraho ingaruka ku mubiri cyangwa mu mitekerereze, rwibutsa ko amategeko arengera umwana kandi ahana abakoresha uburyo bw’ihohoterwa.
Ibi byatangajwe n’Umuvugizi wa RIB, Dr. Murangira B. Thierry, nyuma y’uko uru rwego rugaragaje ko rukomeje kwakira ibirego byinshi bifitanye isano n’abana bahohoterwa bitwaje kubahana.
Ati “Muri iyi minsi turi kubona ababyeyi n’abarimu baha abana bato ibihano biremereye. Turabibutsa ko ibihano biremereye bibangamira uburenganzira bw’abana kuko harimo ibikorwa bitemewe gukorera umwana ubyita ibihano.”
RIB ivuga ko hari ibikorwa byinshi bamwe bafata nk’uburyo bwo gukosora abana nyamara amategeko abifata nk’ihohoterwa. Muri byo harimo gukoresha inkoni, umukandara, inshyi, inkonji, imigeri cyangwa ubundi buryo bwose bushobora gukomeretsa umwana.
Dr. Murangira ati “Gukubita umwana ugasanga wakoresheje inkoni, umukandara, kumurya ibinyunguti, kumukubita inshyi, kumukurura amatwi, kumukubita inkonji, imigeri ndetse n’ibindi bibi.”
Uretse ihohoterwa ryo ku mubiri, RIB yanibukije ko amagambo asesereza, atuka cyangwa atesha umwana agaciro na yo ashobora kugira ingaruka zikomeye ku mikurire n’ubuzima bwo mu mutwe bw’umwana.
Urwego rw’Ubugenzacyaha rugaragaza ko guhana umwana byemewe igihe bikorwa hagamijwe kumwigisha no kumukosora, ariko ntibikwiye gukorwa mu buryo bushingiye ku burakari cyangwa ku guhohotera.
Ati “Ubutumwa burimo si ukubuza ababyeyi guhana abana, ariko igihe uri guhana umwana uri kumuhanana urukundo cyangwa uri kubikorana uburakari.”
RIB yibukije ko umuntu wese uzahamwa n’icyaha cyo guhohotera umwana ashobora guhanishwa ibihano birimo igifungo n’ihazabu, cyane cyane iyo ibyo bihano byateye ibikomere, ubumuga cyangwa urupfu.
Urwego rurasaba ababyeyi n’abarimu gukoresha uburyo bwubaka, bwigisha kandi bwubahiriza uburenganzira bw’umwana kugira ngo abakiri bato bakurire mu mutekano no mu burere bubafasha kuba abaturage beza b’ejo hazaza.