Mu iburanisha ry’ubujurire ku ifunga n’ifungurwa ry’agateganyo ryabaye ku wa 23 Kamena 2026, Yampano yahakanye ko gukomeza gufungwa byagira icyo bimufasha, ahubwo agaragaza ko yifuza gukomeza urugendo rwo kwikosora no kwivuza.
Yajuririye icyemezo cy’Urukiko rw’Ibanze rwa Kicukiro rwari rwategetse ko afungwa iminsi 30 y’agateganyo, asobanura ko hari ingingo zimwe na zimwe zititaweho uko bikwiye.
Aburana yunganirwa n’umunyamategeko, Yampano yagaragaje ko umugore we yamaze kumubabarira ku byaha byo gukubita no gukomeretsa ndetse n’icyo kwangiza ikintu cy’undi, ashimangira ko bombi biyemeje kongera kubaka urugo rushingiye ku bwumvikane n’urukundo.
Ku birebana n’icyaha cyo gukoresha ibiyobyabwenge, uruhande rwe rwashyikirije urukiko inyandiko za muganga zigaragaza ko yari yaratangiye gahunda yo kwivuza agamije kubireka burundu.
Umunyamategeko we yavuze ko umukiliya we yafashe icyemezo cyo gushaka ubufasha bwa muganga ku bushake bwe bwite, ibintu yavuze ko bikwiye gufatwa nk’ikimenyetso cy’ubushake bwo guhinduka.
Ati “Twari tugize Imana tubona umuntu wijyana kwa muganga ku bushake, ubundi abandi usanga bahisha ko babinywa.”
Yampano na we yabwiye urukiko ko atari umuntu usanzwe ugaragara mu byaha, asobanura ko ari bwo bwa mbere ageze imbere y’ubutabera.
Yasabye ko yahabwa amahirwe yo gukurikiranwa adafunzwe kugira ngo akomeze gahunda yo kwivuza no kwita ku buzima bwe bwo mu mutwe, avuga ko gufungwa igihe kirekire bishobora kumugiraho ingaruka zikomeye.
Ati “Iminsi maze muri gereza hari icyo yanyigishije, nkaba nsaba imbabazi nanatakamba.”
Yongeyeho ko yiteguye kubahiriza amabwiriza yose urukiko rwamugenera mu gihe rwafata icyemezo cyo kumurekura by’agateganyo.
Ubushinjacyaha bwo bwakomeje gushimangira ko nubwo hari imbabazi zatanzwe n’umugore we, ibyo bidakuraho ibyaha akekwaho, busaba ko icyemezo cyafashwe n’Urukiko rw’Ibanze cya Kicukiro kigumaho.
Urukiko rwamenyesheje impande zombi ko umwanzuro ku bujurire bwa Yampano uzatangazwa ku wa 26 Kamena 2026 saa cyenda z’umugoroba.