Irushanwa ry'Igikombe cy'Isi cya 2026 rigeze aharyoshye nyuma y'uko hasojwe imikino ya 1/4 cyaraye gikuweho amakipe abiri ya nyuma. Argentina n'u Bwongereza ni zo zabonye itike ya 1/2, zisanga u Bufaransa na Espagne, bityo amakipe ane asigaye akaba ari yo azahatanira kugera ku mukino wa nyuma.
Argentina yabonye itike ya 1/2 nyuma yo gutsinda u Busuwisi ibitego 3-1 nyuma y'inyongera, mu mukino wari ukomeye kandi urimo guhangana gukomeye hagati y'impande zombi.
Alexis Mac Allister yafunguye amazamu ku ruhande rwa Argentina, mbere y'uko Dan Ndoye yishyurira u Busuwisi. Gusa ibintu byahindutse ubwo Breel Embolo yahawe ikarita itukura, bituma Argentina ibona amahirwe yo kwiharira umukino. Mu nyongera, Julián Álvarez na Lautaro Martínez batsinze ibitego bibiri byahesheje La Albiceleste intsinzi n'itike ya 1/2.
Mu wundi mukino wabaye mbere yawo, England yasezereye Norway iyitsinze ibitego 2-1 nyuma y'inyongera. Norway yari yafunguye amazamu ku gitego cya Andreas Schjelderup ku munota wa 36, ariko Jude Bellingham yishyura mbere y'ikiruhuko, nyuma aza gutsinda n'igitego cy'intsinzi mu nyongera, ayobora Three Lions muri kimwe cya kabiri cy'irangiza.
Iyi ntsinzi isize hamenyekanye imikino ibiri ikomeye ya 1/2 izakinwa mu cyumweru gitaha. France, yasezereye Brazil, izahura na Spain, yasezereye u Budage, mu mukino uzakinwa ku wa Kabiri, tariki ya 14 Nyakanga 2026.
Ku wa Gatatu, tariki ya 15 Nyakanga 2026, hazakurikiraho umukino utegerejwe na benshi uzahuza England na Argentina, amakipe yombi afite amateka akomeye mu mupira w'amaguru ndetse n'abakinnyi bafite ubunararibonye bwo guhatanira ibikombe bikomeye.
Abasesenguzi b'umupira w'amaguru bavuga ko imikino ya 1/2 ishobora kuba ari yo ikomeye kurusha indi yose yabanje muri iri rushanwa, kuko amakipe yose asigaye yagaragaje urwego rwo hejuru ndetse buri rimwe rifite intego yo kugera ku mukino wa nyuma no guhatanira igikombe cy'Isi.
Abafana hirya no hino ku Isi bazaba bahanze amaso iyo mikino ibiri, izagena amakipe azacakirana ku mukino wa nyuma, mu gihe andi azahatana mu mukino wo guhatanira umwanya wa gatatu.
AMAFOTO:
Tags
IMIKINO