Amasaha make mbere y’uko umusifuzi atangiza umukino wa nyuma wa UEFA Champions League, amaso y’abakunzi ba ruhago ku migabane yose ahanzwe kuri Arsenal yo mu Bwongereza na Paris Saint-Germain yo mu Bufaransa, amakipe yombi ashaka kwandikisha amateka mashya ku rwego rw’i Burayi.
Ni umukino utegerejwemo ihangana rikomeye hagati y’abakinnyi bafite impano idasanzwe ndetse n’abatoza bafite inyota yo kwegukana kimwe mu bikombe bikomeye kurusha ibindi ku rwego rw’amakipe.
Ku ruhande rwa Arsenal, umutoza Mikel Arteta ashobora kugirira icyizere David Raya mu izamu, mu gihe ubwugarizi burayoborwa na William Saliba na Gabriel Magalhães, bafatwa nk’abakinnyi b’ingenzi mu guhangana n’ubusatirizi bukomeye bwa PSG.
Aba bombi bazaba bafite akazi katoroshye ko guhagarika ba rutahizamu nka Ousmane Dembélé na Khvicha Kvaratskhelia, basanzwe bazwiho umuvuduko, ubuhanga n’ubushobozi bwo guhindura umukino mu gihe gito.
Mu kibuga hagati, Arsenal irashingira cyane kuri Declan Rice, Martin Ødegaard na Myles Lewis-Skelly. Rice akomeje kwigaragaza nk’umukinnyi ushobora guhuza uburinzi n’ubusatirizi, mu gihe Ødegaard azaba ashinzwe kurema uburyo bw’ibitego no kugenzura injyana y’umukino.
Mu busatirizi, Bukayo Saka na Leandro Trossard barafatanya na Viktor Gyökeres, umwe mu bakinnyi bafite icyizere cyo kuba intwaro ikomeye mu gushaka ibitego. Gyökeres amaze igihe agaragaza ubushobozi bwo kubyaza umusaruro amahirwe make abona imbere y’izamu.
Saka na we ategerejweho byinshi muri uyu mukino, cyane cyane kubera ubuhanga bwe mu kunyura ku bakinnyi, gutanga imipira y’ingenzi no guteza ibibazo bikomeye ku bwugarizi bw’abo bahanganye.
Ku ruhande rwa PSG, Matvey Safonov araba ari mu izamu, inyuma ye hari ba Achraf Hakimi, Marquinhos, Willian Pacho na Nuno Mendes. Aba bose barasabwa guhagarika ubusatirizi bwa Arsenal bushobora guteza akaga igihe cyose.
Hagati mu kibuga, João Neves, Vitinha na Fabián Ruiz ni bo bazaba bafite inshingano zo kugenzura umukino. Vitinha by’umwihariko ni umwe mu bakinnyi PSG yishingikirijeho cyane kubera ubushobozi afite bwo kugumana umupira no gutangiza ibitero byihuse.
Imbere, Ousmane Dembélé, Khvicha Kvaratskhelia na Désiré Doué ni bo baraba bahanzwe amaso. Dembélé amaze igihe agaragaza urwego rwo hejuru kandi ashobora gutanga itandukaniro igihe cyose abonye umwanya.
Kvaratskhelia na we ni umwe mu bakinnyi bashobora guca mu bwugarizi bw’abo bahanganye akihangira uburyo cyangwa agatanga umupira uvamo igitego. Naho Doué, nubwo akiri muto, yakomeje kwerekana ko afite impano ishobora kumugira umwe mu bakinnyi bakomeye b’ejo hazaza.
Abasesenguzi benshi bemeza ko hagati mu kibuga ari ho hashobora kugenwa uzasezerera mugenzi we. Arsenal irifashisha Rice na Ødegaard kugira ngo igenzure umupira, mu gihe PSG yizeye Vitinha na João Neves ngo bayobore umukino ku ruhande rwabo.
Iyi final ihuje amakipe yombi afite inyota ikomeye yo kwegukana igikombe. Arsenal irashaka kuba yatwara UEFA Champions League bwa mbere mu mateka yayo, mu gihe PSG nayo ishaka kugera ku nzozi imaze imyaka myinshi ikurikirana zo kwicara ku ntebe y’umwami wa ruhago y’i Burayi.
Nubwo buri ruhande rufite intwaro zarwo, benshi bemeza ko umukino ushobora guterwa n'icyemezo n’umukinnyi umwe, ikosa rimwe ry’ubwugarizi cyangwa ubuhanga bw’umutoza mu minota ya nyuma y’umukino.
Abafana bashobora kwitega umukino urimo ubuhanga, umuvuduko mwinshi n’ihangana rikomeye, bishobora gutuma uyu mukino uba umwe mu mikino ya nyuma izibukwa mu mateka ya UEFA Champions League.