Ikipe y’Igihugu ya Argentine yabonye itike y’umukino wa nyuma w’Igikombe cy’Isi cya FIFA 2026 nyuma yo gutsinda u Bwongereza ibitego 2-1 mu mukino wa 1/2 waranzwe n’ihangana rikomeye ndetse n’ibitego byabonetse mu minota ya nyuma.
Amakipe yombi yinjiye mu mukino yitonda cyane, igice cya mbere kirangira nta ruhande rubashije kubona izamu. Mu gice cya kabiri, u Bwongereza bwafashe iya mbere ku munota wa 55, ubwo Anthony Gordon yatsindaga igitego cyahaye icyizere abasore ba Thomas Tuchel.
Nubwo yari yasigaye inyuma, Argentine yakomeje gusatira ishaka igitego cyo kwishyura. Uko iminota yagendaga ishira, igitutu yashyiraga ku Bwongereza cyariyongereye, kugeza ubwo Enzo Fernández yatsindaga igitego cyo kwishyura ku munota wa 86, agarura icyizere mu bakinnyi ba La Albiceleste.
Ubwo umukino wari ugiye kurangira amakipe yombi anganya, Lautaro Martínez yaje kwigaragaza atsinda igitego cy’intsinzi ku munota wa 90+2, ahesha Argentine intsinzi y’amateka n’itike yo kugera ku mukino wa nyuma.
Mu mukino wose, Lionel Messi yakomeje kugira uruhare mu kubaka uburyo bw’ibitego no kuyobora bagenzi be n’ubwo atigeze atsinda, mu gihe ubwugarizi bwa Argentine bwabashije kwihanganira igitutu cy’u Bwongereza mbere yo kubona intsinzi.
Iyi ntsinzi ishyira Argentine ku mukino wa nyuma, aho izahura na Espagne yasezereye u Bufaransa ibitego 2-0. Ku rundi ruhande, u Bwongereza buzacakirana n’u Bufaransa mu mukino wo guhatanira umwanya wa gatatu.
Argentine izajya muri uwo mukino wa nyuma ishaka kongera kwandika amateka yo kwegukana Igikombe cy’Isi, mu gihe Espagne na yo izaba yifuza kongera kwegukana iri rushanwa nyuma y’imyaka myinshi iritegereje.
AMAFOTO:
Tags
IMIKINO