Mu gihe isi yose yari ihanze amaso umukino wa nyuma wa UEFA Champions League uri buhuze Arsenal na Paris Saint-Germain (PSG) kuri Puskás Aréna i Budapest muri Hungary, hari igihugu kimwe cyari kimaze gutsinda mbere y’uko umusifuzi avuza ifirimbi itangiza umukino.
Nubwo nta kipe yarwo iraba iri muri iri rushanwa, u Rwanda rwabaye kimwe mu byagarutsweho cyane kubera gahunda yarwo yo kwamamaza ubukerarugendo izwi nka Visit Rwanda, isanzwe ifitanye amasezerano n’amakipe yombi yari ageze ku mukino wa nyuma.
Kwamamaza u Rwanda binyuze muri ruhago y’i Burayi si ibintu bishya. Muri Gicurasi 2018, u Rwanda binyuze mu kigo cy'Igihugu gishinzwe iterambere Rwanda Development Board (RDB) rwatangaje ubufatanye na Arsenal FC, aho Visit Rwanda yabaye umufatanyabikorwa wa mbere wagaragaraga ku kuboko kw’imyambaro y’iyi kipe ndetse iba n’umufatanyabikorwa wayo mu bukerarugendo. Aya masezerano yatangiye gushyirwa mu bikorwa mu mwaka w’imikino wa 2018/2019.
Nyuma y’umwaka umwe, mu Ukuboza 2019, u Rwanda rwongeye kwagura ibikorwa byarwo byo kwamamaza ku rwego mpuzamahanga rusinyana amasezerano na Paris Saint-Germain, imwe mu makipe akomeye kandi akunzwe cyane ku Isi. Ubufatanye bwa PSG na Visit Rwanda bwari bugamije kwamamaza ubukerarugendo, umuco, ishoramari ndetse n’ibikorerwa mu Rwanda ku rwego mpuzamahanga.
Mu gihe abakunzi ba ruhago n’abasesenguzi bari bahugiye mu kuganira ku mayeri y’abatoza, imvune z’abakinnyi ndetse n’uburyo buri kipe yiteguye umukino, i Kigali ho hari hamaze kuboneka indi ntsinzi yo kwigaragaza ku rwego mpuzamahanga.
Kwamamaza Visit Rwanda ku myambaro ya Arsenal no mu bikorwa bitandukanye bya PSG byatumye miliyoni amagana z’abakurikira ruhago ku Isi bongera kubona izina ry’u Rwanda ku rwego rwo hejuru.
Mu rwego rwo gushyigikira ayo makipe yombi asanzwe afitanye ubufatanye na Visit Rwanda, Umuyobozi Mukuru wa RDB, Jean-Guy Afrika, hamwe n'Umunyamabanga wa Leta muri Minisiteri ya Siporo, Rwego Ngarambe, Umuyobozi wungirije wa Rwanda Convention Bureau, Maeva S. K. Habyarimana, Ambasaderi w’u Rwanda mu Bwongereza Johnston Busingye ndetse na Ambasaderi w’u Rwanda mu Bufaransa François Nkulikiyimfura bageze i Budapest mbere y’umukino wa nyuma wa UEFA Champions League kugira ngo bashyigikire Arsenal na PSG.
Mu myaka yatambutse, hari abibazaga impamvu igihugu cyo muri Afurika cyashora amafaranga mu makipe yo ku Mugabane w’u Burayi kandi gifite ibindi bibazo by’imbere mu gihugu gikwiye gukemura.
Hari n’ababajije bati: “Kubera iki igihugu cyo muri Afurika gishora miliyoni z’amadolari mu makipe y’i Burayi kandi gifite ibibazo byinshi mu karere?”
Kwamamaza igihugu binyuze muri ruhago si ibintu bireba siporo gusa. Ni uburyo bwo kubaka isura y’igihugu, gukoresha dipolomasi yoroheje ndetse no kwigaragaza mu maso y’Isi.
Mu bihe byashize, ibihugu byamenyekanaga kubera intambara cyangwa ubukungu bukomeye. Ubu hari ibihugu byinshi bihitamo kwiyubakira izina binyuze mu muco, imyidagaduro, ikoranabuhanga, imbuga nkoranyambaga ndetse na siporo.
By’umwihariko, ruhago y’i Burayi ifite abafana benshi cyane muri Afurika. Mu mijyi myinshi yo kuri uyu mugabane, amakipe nka Arsenal, PSG, Bayern Munich cyangwa Atlético Madrid afite abafana b’indahemuka ku buryo gutsinda cyangwa gutsindwa bishobora kuba ingingo y’impaka hagati y’inshuti n’imiryango.
Aho kunenga iyo myumvire, u Rwanda rwabonye ko ishobora kuba amahirwe yo kwamamaza igihugu.
Intego yabaye ugukoresha urukundo rwa ruhago nk’inzira yo kugeza ubutumwa bw’ubukerarugendo bw’u Rwanda ku bantu benshi kurushaho.
Ibyo byatumye ku wa 30 Gicurasi 2026, uko byagenda kose hagati ya Arsenal na PSG, Visit Rwanda iba imwe mu zamaze gutsinda mbere y’uko umukino utangira.
Abahanga mu itumanaho no kwamamaza bashobora kuba bari bamaze kubara uburyo izina ry’u Rwanda rikomeje kugaragara ku mbuga nkoranyambaga, kuri televiziyo no mu bitangazamakuru bikomeye ku Isi.
Binyuze muri ayo masezerano, u Rwanda rwagiye rwiyubakira isura y’igihugu gitekanye, gifite iterambere, cyakira inama mpuzamahanga kandi gifite icyerekezo cyo guhatana ku rwego mpuzamahanga.
Arsenal yahaye u Rwanda uburyo bwo kugera ku bafana benshi ba Premier League, shampiyona ikurikirwa cyane muri Afurika no mu bindi bice by’Isi. PSG yo yahaye u Rwanda uburyo bwo kwihuza n’isi y’imideli, ibyamamare, ubucuruzi n’imyidagaduro yo ku rwego rwo hejuru.
Ikindi cyatangaje benshi ni uko amakipe yose yari ageze muri ½ cya UEFA Champions League yari afitanye imikoranire n’u Rwanda.
Arsenal na PSG zageze ku mukino wa nyuma, ariko na Bayern Munich na Atlético Madrid na zo zisanzwe zifitanye ubufatanye na Visit Rwanda, ibintu byatumye izina ry’u Rwanda rikomeza kugaragara cyane muri iri rushanwa.
Nta mukinnyi warwo wari mu kibuga. Nta kipe yarwo yari muri Champions League. Nta bwo rwateguye final. Ariko rwari ruhari binyuze mu kwamamaza, ubufatanye n’igenamigambi ryagutse ryo kwigaragaza ku rwego mpuzamahanga.
Mu gihe igikombe kigiye gutangirwa i Budapest, i Kigali ho hari kumvikana indi ntsinzi, iyo gukomeza gushyira u Rwanda ku ikarita y’Isi binyuze muri siporo, ubukerarugendo na dipolomasi y’ikirango cy’igihugu.
Iyo ni yo ntsinzi y’u Rwanda rudakoze ku mupira, ariko rugakomeza kugaragara mu birori bikurikirwa n’amamiliyoni y’abafana ku Isi yose.
Amakipe yombi yambara Visit Rwanda agiye guhurira kuri final ya UCL
