Nyuma y'amezi menshi ibiciro bya peteroli bikomeza kuzamuka bitewe n'ibibazo by'umutekano mu Burasirazuba bwo Hagati, ubu isoko mpuzamahanga ryatangiye kugaragaza impinduka nziza. Igiciro cya peteroli idatunganyije cyamanutse kigera ku madolari 72,48 y'Amerika ku kagunguru, urwego rutari rwongeye kugaragara kuva amakimbirane hagati ya Amerika na Iran yatangira kugira ingaruka ku bucuruzi bw'ingufu ku isi.
Abasesenguzi bavuga ko iri gabanuka rifitanye isano n'uko umwuka wa politiki watangiye gutuza nyuma y'uko Amerika na Iran bemeranyije gutangira ibiganiro by'agateganyo bigamije kugabanya ubushyamirane hagati y'impande zombi. Mu bihe byashize, impungenge z'uko urujya n'uruza rw'ibikomoka kuri peteroli rwashoboraga guhagarara zatumye ibiciro bizamuka cyane, aho byigeze kurenga amadolari 120 ku kagunguru.
Ikindi cyagize uruhare mu kugabanya ibiciro ni uko amato atwara peteroli, gaz n'ibindi bicuruzwa yongeye gukoresha Umuhora wa Hormuz ku bwinshi. Amakuru aturuka mu rwego rw'ubwikorezi bwo mu nyanja agaragaza ko ibikorwa byongeye kugenda neza muri uwo muhora, ibintu byatumye amasoko agarura icyizere ku itangwa rya peteroli. Abahanga mu bukungu bemeza ko niba ituze rikomeje kuboneka muri aka karere, ibiciro bya peteroli bishobora gukomeza kugabanuka mu minsi iri imbere.
Tags
OTHERS